Cineuropa 15/160

Basicamente trátase de facer un exercicio de escoller 15 filmes que me parezan salientables do festival Cineuropa deste ano e que teña pensado ir ver. Probablemente esta anotación perda todo sentido unha vez pasado o festival, cando queda claro que os filmes destacables moitas veces saen dos descoñecidos. Ou non, xa se verá.

Indo por partes e comezando pola máis importante, a Sección Oficial:

Kynodontas

Das Weisse Band – Michael Haneke (Austria): porque gañou a Palme d’Or do festival de Cannes. Punto.

Kynodontas G. Lanthimos (Grecia): porque saíu ben parada de Cannes. Pero máis porque din dela que é un filme con argumento un tanto estraño, cun pai que enclaustra aos fillos na casa sen contacto exterior, e que resolve dun xeito algo problemático o tema do espertar sexual adolescente. Catro palabras: sexo, criada, Rocky, incesto.

Aquele Querido Mês de Agosto – Miguel Gomes (Portugal): só polo ben que fala Pawley dela.

Tres Díes Amb la FamíliaMar Coll (Catalunya): porque é unha da sección Novísimos dentro da oficial, porque é un relato de costumes e porque sempre está ben descubrir a unha directora cando comeza. Ademáis ten boa crítica, vaia iso por diante.

Elevator – G. Dorobantu, e Pescuit SportivAdrian Sitaru (Romanía): por situación, neste ano no que non hai presenza de cinema italiano nin escandinavo (salvando unha norueguesa) algo haberá que preocuparse polo cinema emerxente europeu sen ser UK e Francia, e aquí está Romanía, que nestes tempos está facendo cousas moi boas, filmes dos que se fala bastante e moito. Estas dúas pezas veñen avaladas con premios polos catro costados.

Na sección Panorama Internacional, 3 filmiños:

Mal Día para PescarÁlvaro Brechner (Uruguai): dous buscavidas e cambios bruscos no relato dos acontecementos. Comedia e drama. Ninguén fala mal dela, e vén de Uruguai, que é un sitio que trouxo cousas boas ao Cineuropa, sempre cun presuposto baixiño, o que sube o mérito.

Frozen River – Courtney Hunt (USA): desta falo con coñecemento, que xa a teño visto. Do bo que podes esperar da escea independente americana, conflito familiar, tensión e problemática social, ben contado e ben tratado, a protagonista ten un papelón. Ademáis vén avalada polo festival de Sundance, así que ten xustificación abonda.

50 Dead Man WalkingKari Skogland (UK): porque os filmes que tratan os conflitos políticos de Irlanda, por defecto son todos ben feitos, cousa que non se ve aquí coa Guerra Civil, que temos filmes a patadas que son cartos gastados. Logo dos puntos de vista de Michael Collins, En el Nombre del Padre, Bloody Sunday ou Omagh, aquí dase vida á biografía de Martin McGartland, un confidente británico que cumple a súa función ata que finalmente pasa a vida agochado fuxindo do IRA, que descubre a súa identidade.

Da sección Mundo Asia, a que mellores xoias me ten presentado:

Ddongpari (Breathless) – Yang Ik-June (Corea do Sul): un drama, unha historia da violencia. Un gángster criado en pura violencia reacciona agresivamente á sociedade que o rodea. Logo aparece unha rapaza que ten a brutalidade da súa familia gravada tamén nas costas e que é quen de entenderse co prota. E finalmente o irmán da rapaza entra no grupo mafioso do primeiro, e temos armado o filme. Non teño nada máis desta peza se non é por un palmarés amplo de festivais, pero eu espero atopar algo semellante e Chan-wook Park (Old-Boy, Sympathy for Lady Vengeance).

Tôkyô SonataKiyoshi Kurosawa (Xapón): un retrato de familia. O pai perde o traballo e ocúltao, o fillo maior apenas pisa a casa, o menor toma clases de piano ás agochadas -e dáselle ben-, e a nai non sabe como tirar para adiante. Os medios os xustos e o ensinado o necesario. O Claro de Luna de Debussy, o clímax.

A Love ExposureSion Sono (Xapón): algo ten que ter unha comedia cun argumento aparentemente xuvenil e cunha duración de 237 minutos (cousa que normalmente é un punto en contra a non ser que te chames Bergman e fagas Fanny & Alexander) para que teña tal número de boas críticas coma as que lin desta peza. En proporción, demasiadas, intrígame de veras.

Das outras seccións só recollo un filme da Conexión Buenos Aires, outro do ciclo de Takeshi Kitano e outro da Fantastique:

Synecdoche, New York – Charlie Kaufman (USA): o prota fai unha réplica de NYC a tamaño real nun almacén, ten que se un tipo curioso. Teatro. E se nas descricións que fan do filme inclúen referencia a Escher, queda todo dito.

Achilles to kame (Aquiles e a tartaruga) – Takeshi Kitano (Xapón): eternamente coñecido por ser o director de Humor Amarillo, Kitano é un xenio polifacético infravalorado no seu Xapón e non cansa de representalo nos seus filmes. Aquí: témolo nos ollo dun artista mediocre que nos ensina as glorias, absurcedes, frivolidades e mentiras do mundo da arte. A moralexa reafirmada dende o comezo é que cada un ten que persistir no que lle gusta, aínda que non sexa aclamado polos entendidos.

La NanaSebastián Silva (Chile) – filme gañador do premio do xurado World Cinema do festival de Sundance. Punto.

Esta lista de 15/160 non ten que coincidir -raro que o fixera- coa de ninguén, é a miña forma de deixar constancia do que penso antes do festival para logo comentar o que penso despois do festival e observar cambios. Cambios que espero que haxa, porque senón sería unha perda de tempo asistir ao Cineuropa. E a escudriñar o programa, que ha de haber algunhas incompatibilidades horarias, e moi probablemente deixe de ver algunhas destas -a priori-. Máis cousas: o ciclo adicado aos Beatles ten tamén moi boa pinta, pero non o considerei aquí, por non ser filmes actuais; tampouco a Noite Crebinsky ou o Concerto da sala Capitol: quedan como complementos xeitosos. Sobre todo: os dous filmes adicados a Ryuichi Sakamoto, un home que che cambia un filme só coa súa música. E a maratón, polos filmes que poñen este ano, extrapolo que o tema é o terror, pero con matices, que aí vai estar Antichrist de Lars von Trier ou un filme que choca só polo título: Lesbian Vampire Killers.

Vémonos nas salas.

Tags: , , ,

7 Responses to “Cineuropa 15/160”

  1. danielo Says:

    Pon nos comments enlaces máis posts parecidos doutra peña oh!

  2. reidotoxo Says:

    Se os houbera poñíaos, pero non hai máis información da que dan as sinopses e as críticas de catro gatos no filmaffinity e na IMDb.
    Supónse que Ifrit vai facer algo co festival deste ano, a ver se é certo.

    Edito: http://focoblog.com/focoforo/topic.php?id=3516 24 filmes -máis suplementos- indicados por outro vicioso. E coinciden pouco ou nada coa miña lista. O asunto funciona.

  3. ifrit Says:

    Eu vou facer as opinións para GZnación, pero o festival empeza mañá e inda non teño o pase nin as claves para escribir na páxina.

    O ano pasado vin ó redor de 40 filmes. Este ano verei algún menos, que a semana que vén dous días teño que dar un cursiño e as dúas últimas semanas estou en Alemaña :p

    Un para de anos Snob, Martin Pawley e máis eu intentamos botar a andar un blogue sobre o festival http://cineuropa.blogaliza.org/ inda que non tivo moita continuidade (Snob só foi ver un filme e Pawley marchou ó Festival de Xixón) http://cineuropa.blogaliza.org/ Eu a quen queira pásolle o contrasinal e que tire millas (Reidotoxo, interésache? podíase meter tamén os teus twitts, etc.)

    Pois iso, que teño pendente escribir o primeiro artigo en xeral sobre a oferta deste ano (deste estilo http://www.gznacion.com/antigo/ifrit/index.php?cod=132) e recoller a luba de Reidotoxo de elexir 15 (bono e medio?) 😉

  4. reidotoxo Says:

    Vermémons en GZnación, logo. O compañeiro Turonio tamén marcha o 14 a terras xermanas, non sei que terán as mozas de alá. 😉

    O blogue dá moito traballo, é moi máis doado e “moderno” usar o twitter, en principio das menos información pola falta de espazo, pero ao final acabas poñendo máis información poñendo máis tweets, e en tempo real. Xa estou botándolle un ollo a Cineuropa en twitter e facendo un tag para depurar as buscas.

    Bono e medio! Non o pensara, se metera cinco filmes máis quedábame niquelado! Pero sen moito pensalo meto agora mesmo: ‘Le hérisson’, ‘Soul Kitchen’, ‘Un Prophete’, Antichrist’ e ‘Hadewijch’. 2 bonos, que bonito.

    Danielo, vai gardando este enderezo que o tag de Cineuropa no twitter: http://twitter.com/#search?q=%23cineuropa09 . E este, que é o mesmo de antes, pero sen depurar: http://twitter.com/#search?q=cineuropa

  5. Carapucha Says:

    Eu penso que vas ter que mercar máis bonos porque se fas coma o ano pasado e vas “prestando” os teus a todo o mundo… 😉

  6. Flaca Says:

    Non entendo a perra que lles entrou cos Beatles. E punto.

  7. reidotoxo Says:

    Que non entendes? O Cineuropa sempre tivo unha sección DOCmusic moi boa, se este ano se lles ocurriu facer un ciclo coa filmografía dos Beatles, ben feita está.
    E ou entendín mal o teu comentario ou pensas que os Beatles xa chuparon moito festival. E que recorde non houbo ningún filme relacionado nos últimos 3 anos.